Unglingur játar að hafa myrt ferðamann

Fimmtán ára unglingur hefur játað að hafa myrt breskan bakpokaferðalang á þrítugsaldri í nýsjálenska bænum Taupo í janúar í fyrra.

Ferðalangurinn, sem var kona, var á leið til dvalarstaðar síns eftir að hafa heimsótt vini sína. Hún fannst skammt frá dvalarstaðnum með mikla höfuðáverka. Hinn grunaði var upphaflega handtekinn vegna annars máls en fljótlega bárust böndin að honum og játaði hann verknaðinn á sig við yfirheyrslur. Búist er við að dómur verði kveðinn upp í byrjun mars.