Nýjustu heimsendaspár miðast við 2012

Framsýnir menn munu sleppa jólagjafakaupunum eftir fjögur ár því nú þykir margt benda til þess að heimsendir verði rétt fyrir jólin 2012, nánar tiltekið 21. desember.

Reyndar er það ekki margt sem bendir til þess heldur einkum eitt, þessi dagur markar endalok hinnar svokölluðu löngu talningar Maya-þjóðflokksins en hún er nokkurs konar almanak sem spannar 5.126 ár. Margir freistast til að ætla, að fyrst tímatal Maya endar á þessum tímapunkti hljóti allt annað að enda um leið. Fyrst Mayar byggðu glæstar borgir fyrir mörg þúsund árum sem enn standa og spáðu auk þess mikið í stjörnufræði hafi þeir varla verið neinir aukvisar og þarna hafi þeir reiknað út heimsendi.

Þá lenda jörðin, sólin og miðja Vetrarbrautarinnar í beinni línu árið 2012 sem af einhverjum ástæðum þykir ískyggilegt. Vinsæl kenning er að pólskipti verði 2012 en þau fela í sér viðsnúning á segulsviðum jarðarinnar og tortímingu alls lífs. Þetta tvennt er þó ekki vatnshelt. Jörðin, sólin og vetrarbrautarmiðjan raða sér í línu tvisvar á ári og hafa hingað til ekki drepið neinn með því.

Hugtakið pólskipti hljómar nógu skuggalega en reyndin er sú að pólskipti hafa oft orðið án þess að allt líf þurrkist út, síðast gerðist það fyrir 800.000 árum. Kannski er því óhætt að kaupa jólagjafirnar árið 2012, hver veit?