Ummerki um metangas á yfirborði Mars

Ummerki um metangas hafa fundist á yfirborði Mars og getur það gefið til kynna einhvers konar líffræðilega virkni. Meira en 90 prósent af metangasi hér á jörðinni á rætur sínar að rekja til einhvers konar lífrænna vistkerfa og því þykir Michael Mumma og rannsóknarhópi hans hjá bandarísku geimferðastofnuninni NASA það sæta miklum tíðindum að finna merki um metangas á Mars.

Þetta gæti gefið til kynna einhvers konar líffræðilega virkni eða jafnvel frumstætt líf af einhverju tagi. Plöntulíffræðingurinn Chris McKay tekur í sama streng og segir að sé virkilega um metangas að ræða á Mars sé það verulega spennandi. Vísindamönnunum tókst að greina metangasið með því að beita saman stjörnukíki og innrauðum rófgreini með háu tvístri, segi það hugtak einhverjum eitthvað.

Aldur metangassins er hins vegar óræður og erfitt að segja til um hvort það hafi nýlega orðið til eða sé ævafornt. Reiknað hefur verið út að metangas ætti að endast um 300 ár í loftslaginu á Mars en breytingar á magni gassins gefa til kynna að það eyðist mun hraðar. „Eitthvað er að dæla því út og eitthvað er að éta það upp," eins og McKay orðar það. Enn ein ráðgáta á rauðu plánetunni.