Svellkaldur Obama

Fjölmiðlar vestanhafs hafa tekið eftir því hversu yfirvegaður Barack Obama hefur verið í dag þrátt fyrir að einungis fáeinar klukkustundir séu þangað til að hann tekur við einu ábyrgðarmesta starfi heims.

AP fréttastofan segir að Obama hafi sótt góðgerðarsamkomur og boð hjá stuðningsmönnum sínum í allan dag. „Ég svitna ekki," er haft eftir hinum 47 ára gamla verðandi forseta, sem er í þann mund að fara að taka við ábyrgð á tveimur styrjöldum, hagkerfi í miklum vanda og öðru sem fylgir valdamesta ríki heims. „Hafið þið einhvern tímann séð mig svitna, " sagði hann enn fremur.

Ráðgjafar Obama segja að hann sé fullkomlega undirbúinn undir hlutverk sinn. Hann sé margbúinn að fara yfir ávarp sitt, sem hann heldur á morgun. Hann sé jafnframt búinn að undirbúa sig undir fundarhöld á miðvikudag um efnahagsmál, Írak og önnur mál sem verða mjög áberandi á fyrsta árinu hans í embætti.