Drogba með tvö í fyrsta leiknum

Chelsea vann 2-1 sigur á Hull í fyrsta leik tímabilsins í ensku úrvalsdeildinni. Didier Drogba skoraði bæði mörk Chelsea, þar af sigurmarkið í uppbótartíma.

Smelltu hér til að sjá samantekt úr leiknum.

Stephen Hunt skoraði fyrsta mark tímabilsins, á 28. mínútu leiksins, er boltinn datt fyrir hann á besta stað og skoraði hann í autt markið. Þetta var fyrsti leikur Hunt með Hull en hann var keyptur frá Reading í fyrradag.

Níu mínútum síðar jafnaði svo Didier Drogba metin með þrumufleyg beint úr aukaspyrnu. Stuðningsmenn Hull voru þó óánægðir með að aukaspyrnan hafi verið dæmt og þóttu John Obi Mikel detta full auðveldlega í grasið.

Chelsea sótti mikið í síðari hálfleik en allt útlit var fyrir að leiknum myndi lykta með jafntefli. En í uppbótartíma kom svo loks sigurmarkið. Drogba náði að vippa boltanum yfir Boaz Myhill, markvörð Hull, úr afar þröngu færi. Einkar laglega gert hjá Drogba sem byrjar tímabilið glæsilega.