Wenger segir engar líkur á að Fabregas fari

Arsene Wenger, stjóri Arsenal, segir það álíka líklegt að Cesc Fabregas fari til Barcelona á næstu dögum og að félagið fái Lionel Messi frá Börsungum.

Fjölmiðlar hafa greint frá því að undanförnu að Börsungar ætli sér að leggja fram tilboð í Fabregas sem er uppalinn hjá félaginu en fór til Arsenal árið 2003.

„Við getum ekki stjórnað því hvað fjölmiðlar á Spáni fjalla um. En þar er vandamálið það sama og hér - fjölmiðlar eru sífellt að leita af góðum fyrirsögnum."

Ítalskir fjölmiðlar hafa líka látið til sín taka í þessu máli og segja að á mánudaginn muni AC Milan tilkynna að félagið hafi keypt Fabregas frá Arsenal.