Rænt í Osló vegna lottóvinnings pabba

Mál þetta hefur farið hljótt þar sem lögreglan hefur varist frétta meðan á rannsókn stendur.

Norska blaðið Aftenposten hefur nú grafið upp að manninum hafi verið rænt á miðvikudag í síðustu viku.

Faðir hans rekur lítinn veitingastað, eða götueldhús eins og það er kallað í Noregi.

Hann var því enginn auðkýfingur fyrr en hann vann stóran lottvinning fyrir skömmu.

Aftenposten hefur heimildir fyrir því að ræningjarnir hafi krafist fimm milljóna norskra króna í lausnargjald. Það eru um áttatíu milljónir íslenskra króna.

Lögreglunni tókst hinsvegar að þefa upp dvalarstað mannræningjanna og réðst til atlögu á sunnudagskvöldið.

Hún fann fórnarlambið rígbundið liggjandi á dýnu og yfir sat vopnaður vörður. Hann veitti þó ekki mótspyrnu þegar lögreglan sparkaði upp hurðinni.

Alls hafa nú fimm verið handteknir og úrskurðaðir í gæsluvarðhald. Þeir hafa allir komið við sögu lögreglunnar áður.