Mandela í framboði

Mandla Mandela, sonarsonur Nelsons Mandela, fyrrverandi forseta Suður-Afríku, er á leið í stjórnmál. Hann verður í framboði til þings fyrir Afríska þjóðarráðið í kosningum í Suður-Afríku í næsta mánuði.

Kosningarnar eru sagðar þær mest spennandi síðan Mandela varð forseti 1994 þegar aðskilnaðarstefnan leið undir lok í landinu. Nýr stjórnarandstöðuflokkur, Þing fólksins, var stofnaður í desember en í honum eru andstæðingar Jakobs Zuma, núverandi leiðtoga Afríska þjóðarráðsins.

Mandla Mandela er kaupsýslumaður. Hann styður Zuma í embætti forseta í kosningunum en Zuma er sagður sigurstranglegastur. Hann hefur notið töluverðra vinsælda í Suður-Afríku þrátt fyrir ásakanir um spillingu.