Fjögur börn létu lífið vegna óveðurs á Spáni

Óveður hefur valdið manntjóni í Frakklandi og á Spáni í dag. Vindhraði hefur í sumum tilvikum farið upp í nærri fimmtíu metra á sekúndu. Fjögur börn létu lífið þegar þak íþróttahúss nærri Barcelona hrundi í veðurofsanum.

Íþróttahúsið er í Sant Boi rétt fyrir utan Barcelona á norðurhluta Spánar. Krakkar höfðu komið þar saman til að leika hafnabolta. Þau leituðu undir skjólþaki sem tengt er húsinu þegar tóka að hvessa mjög. Þá hrundi þakið yfir þeim og hluti af húsinu sem það tengdist. Vindhraðinn þá var í verst hviðunum hátt í fimmtíu metrar á sekúndu. Fjögur börn létu lífið og sextán slösuðust.

Kona lést þegar veggur hrundi yfir hana í roki sem einnig var í Barcelona á sama tíma í dag og annar vegfarandi, karlmaður, hlaut sömu örlum á Alicante. Þá lést annar maður í Galasíu þegar tré féll ofan á hann í ofsaveðrinu.

Í suð-vesturhluta Frakklands hefur einnig verið vindasamt í dag. Milljón heimili á svæðinu eru án rafmagns þar sem raflínustaurar hafa fallið til jarðar. Tré hafa fallið til jarðar á vegi og lestarteina og því hafa lestarsamgöngur ekki verið með eðlilegu móti. Einn ökumaður týndi lífi og annar slasaðist mikið þegar tré féll á bíla í Landes-héraði. Fólk á svæðinu var í dag hvatt til að halda sig heima vegna óveðursins.

Michel Barnier, landbúnaðarráðherra í ríkisstjórn Frakklands, segir storminn þann versta síðan 1999. Þá fórust áttatíu og átta og fjórar milljónir Frakka voru án rafmagns. Þá tók þrjár vikur að koma þeirri þjónustu í samt lag aftur.