Blagojevich harður á sakleysi sínu

Rod Blagojevich, fyrrum ríkisstjóri Illinois, kveðst saklaus af ásökunum um að hafa ætlað sér að selja öldungadeildarþingsæti Baracks Obama.

Blagojevich lætur engan bilbug á sér finna og stendur á því fastar en fótunum að hann sé saklaus af allri spillingu. Þessu lýsti ríkisstjórinn fyrrverandi yfir í spjallþætti Larry King á CNN í gærkvöldi. Þar sagðist hann enn fremur vilja hreinsa nafn sitt, þing Illinois hefði tekið þá vafasömu ákvörðun að svipta ríkisstjóra embætti sínu án þess að hafa svo mikið sem snefil af sönnunargögnum í höndunum.

King spurði Blagojevich þá hvað hann teldi að þinginu hefði eiginlega gengið til með afdráttarlausri ákvörðun sinni, 59 atkvæðum gegn engu, um brottrekstur hans. Ekki stóð á svarinu, Blagojevich benti strax á að repúblikanar væru einfaldlega þrjóskir og demókratar hefðu ekki getað staðið uppi í hárinu á þeim í þessu máli.

King gat þá ekki annað en spurt hvað ríkisstjórinn fyrrverandi hefði verið að gera ef hann hefði ekki verið að bjóða sæti Obama til sölu. Einfalt, svaraði Blagojevich, menn hefðu einfaldlega kastað fram fjölda hugmynda og miklar umræður farið fram. Eitthvað hefði svo skolast til í kolli manna. Lyktir málsins gætu aldrei orðið annað en sakleysi ríkisstjórans.