Ofsaveður í S-Evrópu

Að minnsta kosti fimmtán eru látnir eftir að ofsaveður gekk yfir Suður-Evrópu í gær. Vindhraðinn náði fellibylsstyrk sumstaðar á svæðinu en vitað er að hann fór upp í ríflega fimmtíu metra á sekúndu. Úrhellisrigning var einnig.

Manntjón varð á Spáni og í suð-vestur Frakklandi. Meðal látinna eru fjögur börn tólf ára og yngri sem týndu lífi þegar hluti af íþróttahúsi nærri Barcelona hrundi. Nærri þrjátíu börn og þjálfarar þeirra urðu undir. Níu slösuðust þar af sjö börn.

Rúmlega ein milljón heimila í Frakklandi eru enn án rafmagns og tug þúsund heimili á Spáni. Sem dæmi um eyðilegginguna rifnaði þak af elliheimili í Bordeaux og þurfti að flytja alla aldraða vistmenn þar í skjól annars staðar.

Nicolas Sarkozy, Frakklandsforseti, er væntanlegur í dag til þeirra svæða sem verst urðu úti í veðurofsanum.

Töluvert hefur dregið úr vindstyrk í nótt þar sem stormurinn færist nú yfir miðhluta Ítalíu. Vindhraðinn nú er ríflega þrjátíu metrar á sekúndu.