Síðasta stóra vígi Tamíltígra fallið

Stjórnarherinn á Srí Lanka hefur lagt undir sig síðasta stóra vígi uppreisnarmanna Tamíltígra í landinu. Talsmaður hersins greindi frá því fyrir stundu að herinn hefur náð á vald sitt hafnarbænum Mullaittivu í austurhluta landsins. Stjórnarhermenn hafa ekki stigið fæti í Mullaittivu síðan Tamíltígrarnir lögðu bæinn undir sig 1996. Tígrarnir eru þó enn með stjórn í nokkrum smærri þorpum. Talsmaður stjórnarhersins segir að yfirráðasvæði tígranna nái nú aðeins yfir 300 ferkílómetra svæði en það var 15.000 ferkílómetrar áður en aftur kom til átaka 2006. Talsmenn tamíltígranna hafa ekki tjáð sig um átök morgunsins.

Vestrænir fréttamenn og sjálfstætt starfandi hafa fengið að koma á átakasvæði til að staðfesta fullyrðingar hersins meðan barist hefur verið síðustu vikur.

Hjálparsamtök hafa lýst því yfir að þau hafi áhyggur af ástandi mála á átakasvæðinu en 250.000 almennir borgarar munu innlyksa þar.

Stjórnvöld á Srí Lanka sögðu upp vopnahléssamning fyrir rétt rúmu ári en Íslendingar og aðrar norrænar þjóðir höfðu eftirlit með framkvæmd hans. Síðan þá hefur stjórnarherinn sótt hart að uppreisnarmönnum sem hafa barist fyrir sjálfstæðu ríki Tamíla í aldarfjórðung. Um sjötíu þúsund manns hafa fallið í því stríði.