Lögmannskostnaður Breta samsvarar 8 mánaða rekstri lögreglunnar

Icesave samkomulagið gerir ráð fyrir því að Íslendingar greiði tveggja milljarða króna lögfræðikostnað Breta vegna málsins. Fyrir þessa upphæð mætti reka lögregluna á höfuðborgarsvæðinu í rúmlega hálft ár.

Þetta kom fram máli Ragnars H. Hall, hæstaréttarlögmanns á málstofu um Icesave samkomulagið í Háskóla Íslands í dag.

Ragnar hefur áður bent á að samkvæmt fyrirliggjandi samkomulagi væru Íslendingar að taka á sig mun meiri skuldbindingar en Evróputilskipunin gerir ráð fyrir.

Ragnar benti á að samkvæmt samkomulaginu er Íslendingum einnig gert að greiða tveggja milljarða króna lögmannskostnað Breta vegna Icesave málsins. Er um ræða lögmannsþóknun vegna ráðgjafar og tilfallandi kostnaður vegna útgreiðslu til breskra Icesave innistæðueigenda.

Ragnar sagði í samtali við fréttastofu í dag að það væri afar einkennilegt að samkomulagið kveði á um ríkisábyrgð á lögmannskostnaði breta - og í raun með öllu óskiljanlegt.

Þessi upphæð er kannski ekki há þegar hún borin saman við heildarlán Breta og Hollendinga vegna Icesave samkomulagsins.

Fyrir tvo milljarða mætti hins vegar reka lögregluna á höfuðborgarsvæðinu í tæpa 8 mánuði og þá er upphæðin ívið lægri en áætlaður tekjuauki ríkissins á þessu ári vegna skattahækkunar á áfengi og tóbaki.