Biskup biður ekki afsökunar

Það vakti mikla reiði meðal gyðinga og raunar víðar þegar Benedikt páfi aflétti bannfæringu af Richard Williamson biskupi.

Meðal þeirra sem hafa gagnrýnt páfa harðlega er Angela Merkel, kanslari Þýskalands og bandarískir þingmenn.

Páfi segir að hann hafi ekki vitað um þessar skoðanir biskupsins og hefur skipað honum að biðjast afsökunar.

Williamson segir hinsvegar að löng og ítarleg söguskoðun hans sjálfs hafi sannfært hann um að helförin hafi verið stórlega ýkt.

Engir gasklefar hafi verið til og ekki nema um 300 þúsund gyðingar látið lífið, ekki þær sex milljónir sem sagan greinir frá.

Hann segir í viðtali við þýska tímaritið Der Spiegel í dag að hann verði að skoða málið upp á nýjan leik.

Hann geti ekki beðið gyðinga afsökunar fyrr en þeirri skoðun sé lokið og þá náttúrlega ekki nema hann komist að nýrri niðurstöðu.