Barist í Srí Lanka

Níu almennir borgarar féllu og tuttugu særðust þegar sprengjum var varpað þrívegis á sjúkrahús á norð-austurhluta Srí Lanka. Árásirnar voru gerðar á síðasta sólahring. Uppreisnarmenn Tamíltígra hafa völdin á svæðinu. Stjórnarher landsins segist ekki hafa gert árásir á sjúkrahúsið.

Sjúkrahúsið er í bænum Puthukkudiyiruppu í Mullaitivu-héðraði þar sem uppreisnarmenn Tamíltígra ráða enn lögum og lofum. Töluvert hefur þrengt að þeim í sókn stjórnarhersins eftir að vopnahléssamkomulagi undir eftirliti Íslendinga og annarra Norðurlanda var sagt upp. Mörg þúsund almennir borgarar búa í héraðinu.

Talsmaður Sameinuðu þjóðanna sagði í samtali við BBC að einni hefði verið varpað á barnalækningadeild sjúkrahússins þar sem margt hafi verið um manninn. Önnur sprengja mun hafa lent á eldhúsinu og sú þriðja á kapellu spítalans. Níu féllu og minnst tuttugu særðust.

Ekki er ljóst hverjir vörpuðu sprengjum á sjúrkahúsið. Stjórnarherinn segist ekki hafa gert það, liðsmenn Tamíltígra hafa ekki tjáð sig um málið.

Mörg hundruð þúsund almennir borgarar eru fastir á átakasvæðum en stjórnarherinn stefnir að því að ganga milli bols og höfuðs á tígrunum og hafa umkringt þá á þrjú hundruð ferkílómetra svæði. Ekki hefur tekist að semja um að koma fólkinu í öruggt skjól.

Tamílar hafa barist fyrir sjálfstæðu ríki í aldarfjórðung og hafa átök síðan þá kostað um sjötíu þúsund manns lífið.