Welbeck: Ég hefði skorað

Sóknarmaðurinn ungi Danny Welbeck hjá Manchester United var ekki í nokkrum vafa um að hann hefði átt að fá vítaspyrnu þegar hann var felldur af Phil Jagielka í vítateig Everton í bikarleik liðanna í gær.

"Hann keyrði inn í mig á vinstri hliðinni og fór svo í fótinn á mér líka þannig að ég missti fótanna. Ég hafði enga ástæðu til að láta mig detta því ég var kominn fram hjá markverðinum og hefði skorað ef hann hefði ekki brotið á mér," sagði Welbeck.

Varnarmaðurinn Jagielka var ekki alveg ósammála mótherja sínum.

"Ég kom við hann, en ég er ekki viss um af hverju hann fór niður. Sem betur fer var ekki dæmd vítaspyrna. Kannski höfðum við heppnina með okkur, en okkur veitti ekki af henni," sagði Jagielka, sem síðar skoraði sigurmark Everton í vítakeppninni.