Fjórir af tíu brotamönnum sleppa með aðvörun

Fjórir af hverjum tíu afbrotamönnum sem fremja alvarleg brot í Bretlandi sleppa með aðvörun þegar í raun ætti að ákæra þá og rétta yfir þeim. Þetta hefur Telegraph eftir David Ruffley, skuggaráðherra lögreglumála, sem nýlega gagnrýndi aukastörf lögreglumanna harðlega.

Hann segir aðvörunartilfellum lögreglu hafa fjölgað um rúmlega 80 prósent síðustu fimm ár og nú sé svo komið að fjöldi innbrotsþjófa, ræningja og kynferðisafbrotamanna sleppi við refsingu á þennan hátt. Þar með er afbrotið ekki skráð á sakavottorð manna og þetta segir Ruffley í raun vera brot gegn borgurum landsins sem eigi heimtingu á skilvirku réttarvörslukerfi.