Þjóðleikhúsráð sagt vanhæft til matsins

Þrír umsækjendur um stöðu þjóðleikhússtjóra andmæla umsögn þjóðleikhúsráðs um hæfni umsækjenda. Tveir til viðbótar íhuga hvort þeir andmæli.

Alls sóttu níu um stöðuna. Tinna Gunnlaugsdóttir þjóðleikhússtjóri og Þórhildur Þorleifsdóttir voru metnar mjög vel hæfar, aðrir hæfir.

Andmælendur segja ráðið ekki hafa metið hæfni umsækjenda né rökstutt umsögn sína.

Það sé vanhæft til að meta hæfni núverandi þjóðleikhússtjóra, því starf ráðsins sé svo samofið starfi hennar að með því að ganga fram hjá henni hefði ráðið fellt áfellisdóm um sjálft sig.

Ari Matthíasson leikari segir sín andmæli ganga út á að „hæfnismat þjóðleikhúsráðs sé algjörlega órökstutt og þar með ómálefnalegt". Hann bendir á að ráðið hafi ekki boðað neinn umsækjanda í viðtal.

Hlín Agnarsdóttir leikstjóri segist í sínum andmælum gagnrýna að ráðið hafi ekki lagt neitt mat á menntun og reynslu umsækjenda:

„Ég vona að ráðuneytið nýti sér athugasemdirnar og að það fari fram eitthvert endurmat, sérstaklega í ljósi þess að þetta getur ekki verið hlutlægt mat hjá ráðinu. Ég fer líka fram á að fá atvinnuviðtal."

Páll Baldvin Baldvinsson, fulltrúi ritstjóra á Fréttablaðinu og kvikmyndaráðgjafi, telur menntamálaráðherra, sem skipar í stöðuna, eiga þann kost einan að „taka allt ferlið til sín í Skuggahverfið".

Með vinnubrögðum sínum hafi ráðið sannað fyrrgreint vanhæfi.

Kolbrún Halldórsdóttir, fyrrum ráðherra, er ekki búin að ákveða hvernig hún bregst við.

„Ég varð fyrir vonbrigðum með þessa umsögn og er mjög hugsi yfir henni," segir hún. „Þeir ákveða að einungis ein reynsla hafi vægi og það er að stýra stofnanaleikhúsi."

Hilmar Jónsson, leikhússtjóri Hafnarfjarðarleikhússins, veltir því einnig fyrir sér hvort hann andmæli. Menntamálaráðherra sé í vanda staddur.

Ráðherrann, Katrín Jakobsdóttir, segist ekki tjá sig fyrr en að andmælafresti loknum.

„Ráðið hefur ákveðið hlutverk og skilar sinni umsögn. Svo er það mitt mat hvað ég geri," segir hún.

Spurð hvort ráðið kunni að vera vanhæft, segir ráðherra að lögin geri ekki sérstaklega ráð fyrir því að einn umsækjenda sé sitjandi þjóðleikhússtjóri:

„Þetta er í fyrsta skipti sem sitjandi stjóri sækir um og við bara skoðum það." Það ætti að gerast í næstu viku.

Sigurður Kaiser framkvæmdastjóri ætlar ekki að andmæla. Það orki tvímælis að ráðið meti hæfi sitjandi stjóra. Það geti varla talist hlutlaust.

Hann treysti þó ráðherra til að ráða í stöðuna. Hún hafi frjálsar hendur, því allir voru metnir hæfir.

klemens@frettabladid.is