Banna Darvocet verkjalyf

Lyfjaeftirlitið í Bandaríkjunum leggur til að Darvon, verkjalyf sem hefur verið á markaði í 50 ár, verði bannað. Kosið var um þetta hjá Lyfjaeftirlitinu í dag og greiddu 14 banninu atkvæði sitt en 12 greiddu á móti því. Lyfið var fyrst samþykkt árið 1957 þegar engin önnur verkjalyf voru í boði fyrir utan aspirin og sterk verkjalyf.

Associated Press fréttastofan segir að lyfið, sem er yfirleitt markaðssett undir heitinu Darvocet sé eitt af 25 mest notuðu verkjalyfunum. Neytendasamtök vestanhafs segja að ákvörðun Lyfjaeftirlitsins hafi verið tekin á þeirri forsendu að lyfið gagnist ekki sérlega vel til þess að draga úr verkjum og líkur séu til þess að það sé ofnotað og notað í sjálfsmorðstilgangi.