Skó kastað að forseta Kína í Cambridge háskóla

Mótmælandi kastaði skó í átt að forsætisráðherra Kína þar sem hann hélt ræðu í Cambridge-háskóla í Bretlandi í gær. Breska ríkisstjórnin hefur beðið þá kínversku afsökunar á þessu.

Wen Jiabao, forsætisráðherra Kína, er í Evrópuferð. Hann var í Bretlandi í gær og átti fund með Gordon Brown, forsætisráðherra Breta. Jiabao hélt síðan ræðu í Cambridge háskóla. Þar vildi einn mótmælandi leggja áherslu á mótmæli sín gegn mannréttindastefnu kínverskra stjórnvalda og greip á ráð Írakans sem varð uppsigað við Bush fyrrverandi Bandaríkjaforseta fyrir skömmu. Skó var kastað í átt að Jiabao um leið og sá sem það gerði kallaði forsætisráðherrann einræðisherra.

Jiabao lét sér ekki bregða. Gerði stutt hlé á máli sínu meðan mótmælandinn var yfirbugaður og hélt síðan áfram eins og ekkert hefði í skorist.

Breska lögreglan hefur greint frá því mótmælandinn verði ákærður fyrir að hafa raskað almannafriði. Ekki hefur verið gefið upp hverrar þjóðar mótmælandinn er.

Breska ríkisstjórnin bað þá kínversku þegar afsökunar. Kínverjar voru ævareiðir sögðu þetta ekki hafa áhrif á samskipti ríkjanna.