Flugstjórinn gat varla talað

Farþegum í rússnesku Aeroflot vélinni leist ekki á blikuna þegar þeir sáu flugstjórann sem átti að fljúga með þá frá Moskvu til New York í desember síðastliðnum.

Augu hans voru blóðhlaupin og hann var óstöðugur á fótunum. Þegar hann byrjaði að segja farþegunum frá fluginu drafaði hann svo að það var varla hægt að skilja hann.

Það tók hann þrjár tilraunir að koma því út úr sér hvað flugið til New York tæki langan tíma.

Meðan flugstjórinn drafaði reyndu farþegarnir að tala við flugfreyjur sem vildu ekkert á þá hlusta. Þær tóku ekki í mál að flugstjórinn væri undir áhrifum.

Ein þeirra sagði raunar að það skipti ekki máli þótt flugstjórinn væri drukkinn. Hann þyrfti bara að ýta á einn hnapp og þá flygi vélin sér sjálf. Það versta sem gæti komið fyrir væri að hann dytti um eitthvað í stjórnklefanum.

Farþegarnir vildu ekki sætta sig við þetta og eftir þriggja klukkustunda hávaða rifrildi var loks skipt um alla áhöfnina.

Rússneska blaðið Moscow Times hefur reynt að fylgja málinu eftir en hefur fengið loðin svör frá Aeroflot. Fyrst var sagt að flugstjórinn hafi hugsanlega fengið hjartaáfall fyrir flugið.

Þegar blaðið reyndi síðar að ná í flugstjórann sjálfan var sagt að hann væri til meðferðar vegna óskilgreinds sjúkdóms, og ekki væri víst að hann flygi aftur.

Áttatíu og átta manns fórust með annarri flugvél frá Aeroflot í september síðasliðnum. Rannsókn leiddi í ljós að flugstjórinn hafði verið drafandi drukkinn.