Vidic: Er hamingjusamur hjá United

Varnarmaðurinn sterki, Nemanja Vidic, hefur tjáð sig um þær sögusagnir að hann sé að íhuga að yfirgefa herbúðir Man. Utd.

Umboðsmaður hans sagði í viðtali á dögunum að Vidic væri afar spenntur fyrir því að fara til Barcelona og hafa sögusagnirnar ekki stoppað síðan.

„Ég hef aldrei sagt neitt um Barcelona, Real Madrid né AC Milan eða nokkurt félag yfir höfuð," sagði Vidic.

„Ég tala aldrei um framtíð mína og því skil ég ekki af hverju einhverjir aðrir gera það. Ég sýndi það á vellinum gegn Wigan að ég er hamingjusamur hjá þessu félagi.

Stuðningsmenn félagsins þurfa aðeins að horfa á mig spila til þess að sjá hversu skuldbundinn ég er félaginu. Ég er búinn að ræða við umboðsmann minn og ég vil ekki heyra fleiri slíka orðróma," sagði Vidic og bætti við að þær sögusagnir að kona hans væri ósátt í Manchester ættu ekki við rök að styðjast.