Játar ábyrgð á sprengjuhótuninni

Magnús Már Guðmundsson skrifar 25. ágúst 2009 16:02

Við Borgarholtsskóla í gær. Mynd/Anton Brink

Maðurinn sem var handtekinn í gær vegna sprengjuhótunar í Borgarholtsskóla hefur játað að hafa hringt í skólann með hótanir um að sprengju væri þar að finna. Hann er laus úr haldi lögreglunnar á höfuðborgarsvæðinu.

Skólinn var rýmdur á svipstundu eftir að maðurinn, sem er um tvítugt, hringdi í skólann í hádeginu en sprengjuleitarmenn Landhelgisgæslunnar fundu enga sprengju í skólanum því um gabb reyndist að ræða.

Maðurinn var handtekinn í heimahúsi í Hafnarfirði í gær í annarlegu ástandi og var látinn sofa úr sér í nótt. Hann er ekki nemandi í skólanum. Maðurinn hefur áður komið við sögu hjá lögreglu.

Málið fer nú til lögfræðideildar lögreglunnar á höfuðborgarsvæðinu sem tekur ákvörðun um hvort að maðurinn verði ákærður fyrir hótunina.

Tengdar fréttir

Maður handtekinn í tengslum við sprengjuhótunina

Samkvæmt heimildum fréttastofu hefur lögregla handtekið ungan karlmann í tengslum við sprengjuhótunina í Borgarholtsskóla í hádeginu í dag. Geir Jón Þórisson, yfirlögregluþjónn, vildi ekki staðfesta það í samtali við fréttastofu að svo stöddu en staðfesti að verið væri að leita aðila í tengslum við málið. Sprengjuhótunin barst skólanum símleiðis laust eftir hádegið.

24. ágúst 2009 14:09

Engin sprengja fannst í Borgarholtsskóla

Sérfræðingar í sprengjuleit hafa lokið störfum í Borgarholtsskóla og fundu þeir enga sprengju.

24. ágúst 2009 14:48

Sprengjudólgur fær að sofa úr sér - yfirheyrður í fyrramálið

Maður um tvítugt, sem var handtekinn vegna sprengjuhótunar í Borgarholtsskóla um síðdegis í dag, verður ekki yfirheyrður fyrr en í fyrramálið. Hann var handtekinn miðdegis eftir að hafa hringt inn í Borgarholtsskóla.

24. ágúst 2009 21:44

Sprengjuleitarmenn komnir í Borgarholtsskóla

Sprengjubíll frá ríkislögreglustjóra er kominn upp í Borgarholtsskóla og verður gerð leit að sprengjunni á næstu mínútum. Samkvæmt upplýsingum frá fréttamanni Stöðvar 2 og Vísis sem er er á staðnum er töluverður viðbúnaður þar. Fjölmargir lögreglubílar og -hjól hafa verið send á staðinn. Þá var dælubíll frá slökkviliðinu og tveir sjúkrabílar sendir á staðinn. Sprengjuhótunin barst símleiðis laust eftir hádegið í dag.

24. ágúst 2009 13:39

Nemendur þurftu að skilja eftir allar eigur og hlaupa út

Varaformaður nemendafélags Borgarholtsskóla segir nemendur hafa þurft að rýma skólann á augabragði. Sumir þurftu að skilja bíl- og húslykla og önnur verðmæti eftir inni í skólanum svo rýmingin gengi hratt fyrir sig.

24. ágúst 2009 13:26

Hinn handtekni í annarlegu ástandi

Ekki hefur verið unnt að yfirheyra karl um tvítugt sem handtekinn var fyrr í dag í tengslum við sprengjuhótunina í Borgarholtsskóla vegna ástands hans. Maðurinn hefur áður komið við sögu hjá lögreglu. Hann er ekki nemandi við skólann.

24. ágúst 2009 15:36

Borgarholtsskóli rýmdur vegna sprengjuhótunar

Borgarholtsskóli í Grafarvogi var rýmdur fyrir stundu og er fjölmennt lögreglulið statt við skólann núna. Að sögn vaktstjóra hjá Slökkviliði höfuðborgarsvæðisins er um sprengjuhótun að ræða.

24. ágúst 2009 12:47

Yfirheyrður í hádeginu vegna sprengjuhótunarinnar

Maðurinn sem var handtekinn í gær vegna sprengjuhótunar í Borgarholtsskóla verður yfirheyrður nú í hádeginu. Hann er grunaður um að hafa hringt í skólann í gær með hótanir um að sprengju væri þar að finna. Skólinn var rýmdur á svipstundu en sprengjuleitarmenn Landhelgisgæslunnar fundu enga sprengju í skólanum, um gabb reynist að ræða.

25. ágúst 2009 12:14