Danir þurfa aðstoð við að uppræta salmonellufaraldur

Það er Dönum ennþá hulin ráðgáta hvers vegna salmonellufaraldur hefur herjað á þá allt frá síðasta sumar. Talað er um að þetta sé einhver versti salmonellufaraldur sem þeir hafi séð. Fæðumálaráðherra Danmerkur, Eva Kjer Hansen, hyggst þess vegna láta fara fram rannsókn á orsökum faraldursins.

„Ég er ekki í vafa um að fagmennirnir hafa gert allt sem í þeirra valdi hefur staðið til að komast að þessu. En þeir hafa samt sem áður ekki haft erindi sem erfiði og það er væntanlega vegna þess að salmonella er margbrotinn sjúkdómur," segir fæðumálaráðherrann.

Hún ætlar að leita að sérfræðingum erlendis til þess að komast til botns í málinu. Hún vill að skýrsla liggi fyrir um málið fyrir sumarið.