Tugir hafa brunnið lifandi í kjarreldunum

Tugir manna hafa brunnið lifandi í bílum sínum þegar þeir reyndu að flýja kjarreldana í Ástralíu. Um eitthundrað manns hafa farist um helgina og heilu þorpin hafa fuðrað upp á nokkrum mínútum.

Fjallháir kjarreldarnir hafa orðið um eitthundrað manns að bana í Viktoríuhéraði í Suður-Ástralíu um helgina. Lofthitinn hefur verið um 48 gráður á Celsíus.

Stífir vindar hafa búið til hreina eldstorma sem hafa farið svo hratt yfir að fólk hefur ekki haft ráðrúm til þess að flýja.

Á götum í brunarústum bæjanna má sjá flök af bílum sem lentu í hörðum árekstrum þegar fólkið reyndi í örvæntingu að flýja eldvegginn.

Reykurinn var þá orðinn svo svartur að það sá ekki út úr augum. Því urðu árekstrar og fólkið brann í óökufærum bílunum. Meðal bæja sem brunnu var Marysville. Judy Jans var ein af heppnari íbúum bæjarins. Hún lifði.

Þúsundir slökkviliðsmanna og sjálfboðaliða börðust við kjarrelda á einum fjörutíu stöðum þegar verst var. Við fyrstu sýn er talið að um eittþúsund íbúðarhús hafi brunnið til kaldra kola.

Búist er við að sú tala muni hækka verulega áður en upp verður staðið. Sem og tala látinna. Slökkviliðsmenn eru að tína upp lík hvar sem þeir fara. Auk þeirra sem hafa farist eru margir stórslasaðir af brunasárum.

Kjarreldar eru ekki óalgengir í Ástralíu á þessum árstíma, en nú er þar sumar með tilheyrandi hitum og þurrki. Þessir eru þó þeir verstu í manna minnum.