Enska slúðurblaðið The Daily Mail birti í dag uppsláttarfrétt um að Chelsea væri nálægt því að kaupa Argentínumanninn Sergio Aguero frá spænska liðinu Atletico Madrid en að sögn blaðsins þá mun enska liðið láta Portúgalann Deco fara með í kaupbæti.
Chelsea mun vera að bjóða 38 milljónir punda og Deco að auki í þennan 21 árs gamla argentínska framherja en Sergio Aguero hefur skorað 42 mörk í 112 deildarleikjum með Atletico Madrid og 6 mörk í 18 landsleikjum með Argentínu.
Það er almennt talið að spænska liðið vilji fá 50 milljónir punda fyrir stjörnuframherjann sinn sem hefur skorað 19 og 17 mörk á síðustu tveimur tímabilum í spænsku deildinni.
Chelsea hefur verið rólegt á leikmannamarkaðnum í sumar en þeir Ross Turnbull, Daniel Sturridge og Yuri Zhirkov hafa komið til liðsins. Chelsea hefur verið orðað við nokkra stjörnuleikmenn eins og Franck Ribery, Andrea Pirlo auk Sergio Aguero.
Deco mun örugglega fagna því að komast aftur til Spánar þar sem hann lék með Barcelona í fjögur tímabil en Portúgalinn sem er orðinn 31 árs gamall hefur ekki fundið sig á Brúnni.
Arsenal
Leeds
