Skildu tólf lík eftir í vegkanti

Lögregla í vesturhluta Mexíkó fann í gær tólf lík sem skilin höfðu verið eftir í vegkanti.

Ekkert lát er á átökum glæpagengja í Mexíkó og virðist það ekki duga til að binda endi á skálmöldina að Felipe Calderon forseti hafi sent þúsundir hermanna út á götur alræmdustu borganna til að knýja fram frið. Hörðustu átökin eru milli Los Zetas-hópsins annars vegar, sem er herská fylking innan Flóabandalagsins, Cártel del Golfo, sem stundar fíkniefnaviðskipti við Mexíkóflóann, og La Familia-klíkunnar í Michoacan hins vegar.

Líkin tólf eru talin tengjast átökum þessara hópa en banamein þeirra allra voru skotsár. Sérsveit lögreglu hafði hendur í hári eins af hæst settu stjórnendum La Familia í síðustu viku en fátt virðist duga til að stöðva stríðið. Bandarísk yfirvöld hafa nú af því þungar áhyggjur að átök færist í auknum mæli inn í þau ríki sem næst liggi mexíkósku landamærunum Bandaríkjamegin enda hafa mexíkóskir smyglarar komið sér upp harðsvíruðum bandamönnum handan landamæranna til að auðvelda sér starfið. Veltan af flutningi suðuramerískra fíkniefna gegnum Mexíkó til Bandaríkjanna er um 40 milljarðar dollara á ári.