Facebook vill selja upplýsingar um þig

Facebook mun selja upplýsingar um kynhneigð þína, kyn, aldur og áhugamál til fyrirtækja sem síðan munu senda þér markhópamiðaðar auglýsingar. Það er eigandi Facebook Mark Zuckerberg sem er með þessi áform á prjónunum en hann býr yfir þessum upplýsingum um þá 150 milljón notendur Facebook.

Þvert á það sem gengur og gerist á netsíðum sem þessum hefur Facebook áform um að selja þessar upplýsingar til þriðja aðila.

Fyrirtækið er sagt standa illa fjárhagslega í ljós fjármálakreppunnar og þessir peningar eru því kærkomnir í peningakassa fyrirtækisins sem farið hefur sigurför um netheima síðasta árið. Zuckerberg er sagður geta fengið um 15 milljarða dollara fyrir þessar upplýsingar.

Randi Zuckerberg markaðsstjóri Facebook og systir stofnandans segir í viðtali við breska blaðið The Telegraph að fjölþjóðleg fyrirtæki hafi sýnt mikinn áhuga á þeim möguleika að fá upplýsingar í rauntíma frá þeim milljónum sem nota Facebook.

„Ég hef talað við fullt af fólki sem segir þetta vera svo ótrúlegt fyrir viðskipti sín. Það tekur mjög langan tíma að setja saman rýnihópa, og fyrirtæki hafa oft ekki tíma til þess. Ég held þeim hafi líka líkað þessi tafarlausa svörun sem við getum boðið upp á," segir Randi.