Sænsk lögregla skaut mann til bana

Lögreglan í Trelleborg í Svíþjóð skaut tæplega sextugan mann til bana á heimili hans í nótt þegar hann réðst gegn tveimur lögregluþjónum með hníf á lofti.

Maðurinn hafði fyrr um kvöldið hringt í neyðarlínuna og tilkynnt að hann væri í sjálfsmorðshugleiðingum. Þá sagðist hann vera með hníf og voru lögreglumenn sendir til að ræða við hann. Um leið og þeir mættu á staðinn skipti það engum togum að maðurinn æddi á móti þeim með hnífinn á lofti og sinnti engum varnaðarorðum. Var hann því skotinn þremur skotum og lést samstundis.