Ferdinand reiknar ekki með Arsenal í titilbaráttunni

Rio Ferdinand, leikmaður Manchester United, á ekki von á því að Arsenal muni blanda sér í baráttuna um enska meistaratitilinn á þessu tímabili.

Ferdinand telur að titilbaráttan muni standa á milli United, Chelsea og Liverpool. „Ég á von á því að þessi þrjú félög muni byrja að stinga hin liðin af fljótlega eftir jól," sagði Ferdinand.

„Ég tel að það sé ekki ómögulegt fyrir Arsenal að gera atlögu að titlinum en það er mín persónulega skoðun að þetta verði barátta þessara þriggja félaga að þessu sinni."

Arsenal er átta stigum á eftir toppliði Liverpool, sjö á eftir Chelsea og tveimur á eftir United. Arsenal hefur þegar tapað fimm leikjum á tímabilinu og gert þrjú jafntefli.