Chelsea lagði United í fjörugum leik

Chelsea vann í dag gríðarlega mikilvægan 2-1 sigur á Manchester United í toppbaráttunni í ensku úrvalsdeildinni og þar með eru liðin orðin jöfn með 81 stig á toppnum. Michael Ballack var hetja þeirra bláklæddu í dag og skoraði bæði mörk heimamanna.

Sigur Chelsea var verðskuldaður í dag en liðið var sterkari aðilinn lengst af í leiknum. Joe Cole fékk besta færi liðsins í fyrri hálfleik þegar skot hans hrökk í þverslá United-marksins. Það var svo Michael Ballack sem kom Chelsea yfir með fallegu skallamarki eftir fyrirgjöf Didier Drogba á lokamínútum fyrri hálfleiks.

Sir Alex Ferguson hvíldi nokkra af lykilmönnum sínum í leiknum í dag og það kom niður á leik liðsins - í það minnsta í fyrri hálfleik, sem var eign heimamanna. Ekki bætti úr skák að varnarjaxlinn Nemanja Vidic fékk spark í höfuðið og þurfti að fara af velli meiddur.

Wayne Rooney var greinilega meiddur í leiknum en það kom ekki í veg fyrir að hann jafnaði leikinn fyrir gestina eftir glórulaus mistök þeirra Ferreira og Carvalho í vörn Chelsea.

Heimamenn létu þetta ekki á sig fá og þegar rúmar 10 mínútur voru til leiksloka fékk Chelsea vítaspyrnu þegar fyrirgjöf hrökk í höndina á Michael Carrick. Michael Ballack skoraði af öryggi úr vítinu og tryggði Chelsea dýrmætan sigur. United menn fengu reyndar tvö góð færi þegar þeir sóttu án afláts á lokamínútunum og þurfti Chelsea í tvígang að bjarga á marklínu.

Liðin eru nú jöfn í toppsæti deildarinnar með 81 stig eins og fyrr sagði, en United er með betra markahlutfall og nægir því að vinna síðustu tvo deildarleiki sína til að landa titlinum.