Umsókn Guðjóns komin til Crewe

Talsmaður enska C-deildarliðsins Crewe Alexandra staðfesti í samtali við Vísi að félagið hafi móttekið umsókn Guðjóns Þórðarsonar um stöðu knattspyrnustjóra.

Guðjón sagði frá því í síðustu viku að hann hafi rætt við félagið sem hefur nú verið án knattspyrnustjóra síðan að Steve Holland var sagt upp störfum í síðasta mánuði.

„Félaginu hefur borist mikinn fjöldi umsókna og ég veit að ein þeirra er frá Guðjóni," sagði talsmaður félagsins í samtali við Vísi. „En meira get ég ekki sagt um hans mál. Stjórnin mun funda nú á fimmtudaginn og velja 4-5 menn til að ræða við. Það er enginn ákveðin tímamörk enda ætlar félagið að vanda vel til valsins."

Crewe er nú í neðsta sæti C-deildarinnar með aðeins níu stig eftir átján leiki.