Chelsea neitaði beiðni Inter

Chelsea hefur staðfest að hafa fengið beiðni frá Ítalíumeisturum Inter sem vilja ræða um hugsanleg kaup á Frank Lampard. Chelsea hefur svarað þessari beiðni neitandi, Lampard muni verða áfram hjá liðinu.

Lampard er efstur á óskalista Inter en Chelsea hefur engan áhuga á að selja leikmanninn. Lampard hefur verið í viðræðum um nýjan samning á Stamford Bridge en þær viðræður hafa engu skilað enn sem komið er.

Eftir kaup Chelsea á Deco urðu þær raddir háværari að Lampard væri á förum en svo virðist hinsvegar ekki vera miðað við þessar fréttir.