Aðalmeðferð í Byrgismáli í fjóra daga

Aðalmeðferð í máli ákæruvaldsins á hendur Guðmundir Jónssyni, fyrrverandi forstöðumanni Byrgisins, vegna meintra kynferðisbrota hans gegn fjórum konum hófst í Héraðsdómi Suðurlands í morgun.

Samkvæmt upplýsingum á vef héraðsdóms stendur þinghaldið til sjö í kvöld en gert er ráð fyrir fjórum dögum í aðalmeðferðina. Alls kærðu átta konur Guðmund fyrir kynferðisbrot en ákært var vegna fjögurra þeirra, þar af einnar sautján ára.

Er honum gefið að sök að hafa notfært sér andlega annmarka kvennanna til þess að hafa við þær samræði eða önnur kynferðismök meðan þær voru vistmenn í Byrginu. Upp komst um málið eftir umfjöllun fréttaskýringaþáttarins Kompáss í desember 2006.

Þinghald í Byrgismálinu er lokað.