Upphitun fyrir leiki kvöldsins á Englandi

Nokkrir áhugaverðir leikir eru á dagskrá í ensku úrvalsdeildinni í knattspyrnu í kvöld og verða þeir allir sýndir beint á rásum Sýnar.

Manchester United freistar þess að ná toppsæti deildarinnar á ný þegar það tekur á móti Portsmouth á Old Trafford. United fer á toppinn á markamun ef það vinnur sigur, en Arsenal er á toppnum eftir góðan 3-0 sigur á Newcastle í gærkvöld.

Chelsea er ekki langt á eftir toppliðunum í þriðja sætinu og þó liðið hafi ekki spilað sérstaklega vel undanfarið, verður það að teljast sigurstranglegt gegn Reading í kvöld. Reading er aðeins tveimur stigum fyrir ofan fallsvæðið og mikið þarf að ganga á svo liðið stöðvi 74 leikja hrinu Chelsea án taps á Stamford Bridge.

Everton er í bullandi baráttu um sæti í Meistaradeildinni og í kvöld tekur liðið á móti Tottenham á heimavelli sínum. Þar mætast væntanlega stálin stinn, en lærisveinar Juande Ramos hafa verið að rétta úr kútnum nýverið. Vel kemur til greina að Jonathan Woodgate spili sinn fyrsta leik fyrir Tottenham í kvöld.

Mikil pressa verður á lærisveinum Rafa Benitez í Liverpool þegar þeir sækja Íslendingalið West Ham heim á Upton Park. Ekkert minna en Meistaradeildarsæti dugar Benitez á leiktíðinni og vonandi ná hans menn að hressa sig við eftir að hafa lent í vandræðum með áhugamennina í Havant & Waterlooville í bikarnum á dögunum.

Botnlið Derby tekur á móti Manchester City á Pride Park þar sem gestirnir munu reyna að jafna sig eftir "blöðrumarkið" fræga sem þeir fengu á sig þegar þeir duttu út úr bikarnum gegn Sheffield United. Derby hefur aðeins fengið 7 stig úr fyrstu 23 leikjum sínum í vetur og virðist dæmt til að falla.

Leikir kvöldsins:

West Ham - Liverpool, 19:45 Sýn

Man Utd - Portsmouth, 20:00 Extra

Chelsea - Reading, 19:45 Extra 2

Everton - Tottenham, 20:00 Extra 3

Derby - Man City, 19:45 Extra 4