Ómögulegt að fá Ronaldo

Ramon Calderon, forseti Real Madrid, segir að ómögulegt sé fyrir félagið að kaupa Cristiano Ronaldo í sumar. Ronaldo hefur sterklega verið orðaður við spænska stórliðið.

Alex Ferguson, stjóri Manchester United, er orðinn vel pirraður á stjórnarmönnum Real Madrid og sakar þá um að vera að hræra of mikið í Ronaldo.

„Það þarf ekkert að ræða þessi mál því eins og staðan er núna er ómögulegt að hann komi til okkar. Manchester United harðneitar að selja hann og við þurfum því ekki að ræða þessi mál frekar," sagði Calderon.

„Það væri frábært að fá Cristiano til liðsins en ef ég tjá mig meira um þetta þá skemmir það bara sambandið milli þessara félaga. Samband okkar við Manchester United hefur verið gott."