Þriðji Portúgalinn og sá fjórði frá United

Cristiano Ronaldo varð í dag þriðji portúgalski knattspyrnumaðurinn til að hljóta Gullknöttinn og sá fjórði úr röðum Manchester United.

Alls hafa sex leikmenn enskra félagsliða hlotið verðlaunin en í þeim hópi eru einungis þrír Englendingar.

Eusebio varð fyrsti Portúgalinn til að hljóta verðlaunin árið 1965 en Luis Figo fylgdi í fótspor hans árið 2000, og nú Ronaldo.

France Football veitti Gullknöttinn í fyrsta sinn árijð 1956 og hlaut þá Stanley Matthews útnefninguna en hann var þá leikmaður Blackpool.

Á árunum 1964 til 1968 hlutu þrír leikmenn Manchester United Gullknöttinn - Skotinn Denis Law árið 1964, Bobby Charlton frá Englandi árið 1966 og Norður-Írinn George Best tveimur árum síðar.

Michael Owen hlaut svo verðlaunin árið 2001 en hann var þá leikmaður Liverpool.