Tottenham enn að eltast við Eto´o?

Breskir fjölmiðlar fullyrða í dag að úrvalsdeildarfélagið Tottenham sé tilbúið að bjóða Barcelona 24 milljónir punda í framherjann Samuel Eto´o - eða um 8 milljónum hærra tilboð en Mílanófélögin Inter og AC.

Þau virðast ekki taka það með í reikninginn að leikmaðurinn hafi þegar lýst því yfir að hann hafi engan áhuga á að fara til Tottenham, en félagið getur sem kunnugt er ekki boðið honum þáttöku í Meistaradeild Evrópu.

London Evening Standard gekk svo langt að segja að forráðamenn Tottenham væru að afla sér stuðningsaðila til að verða við rúmlega 100,000 punda vikulaunum sem Eto´o er sagður vilja fá.

Ljóst er að forráðamenn Tottenham munu væntanlega þurfa að næla sér í framherja í sumar, því afar ólíklegt þykir að Búlgarinn Dimitar Berbatov verði með liðnu á næstu leiktíð.

Hann hefur lengi verið orðaður við nokkur af stærstu félögum Evrópu og var ekki viðstaddur þegar liðið kynnti nýju keppnistreyjuna fyrir síðasta heimaleikinn í deildinni - en það þótti bera vott um að markaskorarinn væri á förum í sumar.