Wenger sér eftir Flamini

Arsene Wenger, stjóri Arsenal, sér eftir því að Mathieu Flamini fari frá liðinu til AC Milan í sumar.

Enskir fjölmiðlar hafa sagt frá því að Flamini hafi hafnað tilboði frá Arsenal sem hefði tryggt honum 55 þúsund pund í vikulaun.

Í síðustu viku var sagt frá því að AC Milan væri reiðubúið að borga Flamini 144 þúsund pund í vikulaun en hann skrifaði undir fjögurra ára samning við liðið á mánudaginn. Samningur Flamini við Arsenal rennur út í lok leiktíðarinnar.

„(Launin) sköpuðu vandamál en við náðum aldrei stjórn á þessu máli varðandi Flamini," sagði Wenger. „Ég verð að segja að ég varð fyrir vonbrigðum með að hann ákvað að fara en hann hafði allan lagalegan rétt til þess."