Vill ekki láta líkja sér við Eið Smára

Viktor Unnar Illugason hjá Reading, sem nú leikur sem lánsmaður hjá utandeildarliðinu Eastbourne Borough, segist ekki kæra sig um að vera líkt við Eið Smára Guðjohnsen.

Viktor kom inn sem varamaður í leik liðsins gegn Forest Green Rovers á þriðjudagskvöldið og þótti standa sig vel að mati staðarblaða.

Þar var Viktori lýst sem "einum efnilegasta knattspyrnumanni frá Íslandi síðan Eiður Smári kom fram á sjónvarsviðið."

Viktor er ekki sérlega hrifinn af þeim stimpli, en segist fyrst og fremst vilja ná sér af bakmeiðslum sem hafa verið að hrjá hann.

"Ég hef verið að berjast við bakmeiðsli í hálft ár og þetta var bara fyrsti leikur minn í langan tíma. Ég frétti seint að ég væri að koma til Eastbourne og deildin hérna er líklega svipuð og fyrsta deildin á Íslandi," sagði Viktor.

"Ég hef heyrt að ég hafi verið borinn saman við Eið Smára en ég er ólíkur leikmaður. Ég er ekki mjög góður í loftinu þó ég sé hávaxinn og vil heldur fá boltann í lappirnar. Ég hef spilað mikið á vinstri kanti hjá Reading, en ég vil helst spila í framlínunni," sagði Viktor.