,,Árni stendur mjög erfiða vakt"

Geir H. Haarde, forsætisráðherra, segir að Árni Mathiesen, fjármálaráðherra, standi mjög erfiða vakt þessa dagana. Árni sé að halda til ákveðnum reglum en hann hefur fyrir hönd ríkisins stefnt félagi ljósmæðra vegna ólöglegra fjöldauppsagna.

,,Það má segja að það sé óheppilegt en hann er að halda til haga ákveðnum reglum sem gilda á hinum opinbera vinnumarkaði um hvernig megi og eiga að standa að uppsögnum. Gagnvart öðrum hópum sem ríkið semur við og þeir eru á annað hundrað er mjög mikilvægt að þetta regluverk liggi fyrir," sagði Geir í Silfri-Egils þar sem hann var gestur fyrr í dag.

Ljósmæður eru mikilvæg og viðkvæm stétt, að mati Geirs sem telur óheppilegt að deilt sé um kjör þeirra.

Ljósmæður vilja að menntun þeirra verið metin til launa til samræmis við aðrar stéttir hjá ríkinu. Næsti samningafundur í deilunni hefur verið boðaður á mánudaginn klukkan eitt.

Viðtal Egils Helgasonar við Geir er hægt að nálgast hér.