Ekki er grunur um pólskt glæpagengi í Röstinni

Pólverjinn sem handtekinn var í Reykjanesbæ í gærkvöldi býr ásamt samlöndum sínum í húsi sem heitir Röstin. Húsið er í eigu Víkurrastar ehf en þar eru leigð út herbergi. Ákveðið verður seinni partinn í dag hvort maðurinn verði úrskurðaður í gæsluvarðhald en handtakan tengist hrottalegri árás í Keilufelli um helgina.

Fréttastofa Stöðvar 2 sagði frá því á mánudag að grunur væri að pólskt glæpagengi væri búsett í Reykjanesbæ. Samkvæmt heimildum Vísis búa nokkrir Pólverjar í Röstinni sem stendur við Hrannargötu í bænum. Einungis þrír íslendingar eru eftir í húsinu en Pólverjarnir sem þar eru búsettir vinna hjá verktakafyrirtæki á Suðurnesjum eftir því sem Vísir kemst næst.

Að sögn lögreglunnar á Suðurnesjum hefur ekki verið uppi grunur um að glæpagengi sé búsett í Röstinni en verið er að skoða málið. Lögreglan hafði áður handtekið fjóra vegna málsins en þeir eru allir búsettir á Suðurnesjum. Ekki er vitað um tengsl þeirra manna við Röstina en yfir 800 Pólverjar búa á Suðurnesjum.

Lögreglan leitar nú að einum manni til viðbótar við þá fjóra sem þegar eru í haldi. Sá heitir Tomasz Krzysztof Jagiela og er fæddur árið 1980. Rannsókn er í fullum gangi að sögn lögreglunnar á höfuðborgarsvæðinu en talið er að árásarmennirnir í Keilufelli hafi verið á bilinu 10-12.

Þeir réðust inn í hús við Keilufell á skírdag vopnaðir kylfum, öxi, slaghömrum og járnröri. Í húsinu voru sjö pólskir karlmenn sem leigja húsið saman. Nágrannarnir náðu að hringja á lögreglu og gáfu henni upp bílnúmerið á öðrum bílnum sem árásarmennirnir voru á. Þeir voru síðar handteknir á Reykjanesbraut.