Pardew hættur hjá Charlton

Alan Pardew hætti í gær sem knattspyrnustjóri Charlton eftir að hafa náð samkomulagi um starfslok við forráðamenn félagsins.

Charlton tapaði í gær fyrir Sheffield United, 5-2, í ensku B-deildinni. Það var áttundi leikur liðsins í röð þar sem liðinu mistekst að innbyrða sigur.

„Ég átti farsælan feril að baki þegar ég kom hingað en þetta hefur verið erfitt," sagði Pardew í gær. Hann tók við liðinu í desember árið 2006 eftir að hann var látinn fara frá West Ham, skömmu eftir að Björgólfur Guðmundsson keypti félagið.

„Félagið hefur verið á niðurleið síðan ég kom hingað og mér hefur ekki tekist að snúa því gengi við."

Charlton er nú í fallhættu í B-deildinni og liðið tapaði fyrir Yeovil í ensku deildarbikarkeppninni fyrr á leiktíðinni.

Alan Curbishley, sem einnig var hjá West Ham, hefur verið orðaður við starfið. Curbishley var stjóri Charlton í fimmtán ár, þar til 2006.