Defoe íhugar aðgerð

Jermain Defoe íhugar nú hvort að hann eigi að gangast undir aðgerð vegna meiðsla á kálfa sem hafa verið að angra hann í síðustu þremur leikjum.

Defoe, sem er á mála hjá Portsmouth, fór meiddur af velli í vináttulandsleik Englands og Þýskalands í vikunni og missti af leik Portsmouth gegn Hull í gær. Hann mun hitta sérfræðing á morgun en ef hann ákveður að fara í aðgerðina verður hann frá í mánuð.

„Það var annar enskur landsliðsmaður sem þurfti að fara í aðgerð til að ná sér góðum af slíkum meiðslum. Þetta er orðið það slæmt hjá mér að ég er það dofinn í fætinum þegar ég spila að ég finn ekki fyrir honum. Ég hef reynt ýmislegt, til að mynda nálastungumeðferð, en ekkert hefur virkað."