Risatilboð í Terry sagt í vændum

Enska götublaðið News of the World segir að eigendur Manchester City séu að undirbúa 60 milljóna punda tilboð í John Terry, fyrirliða enska landsliðsins og Chelsea.

City er sagt vilja láta til skarar skríða strax í janúar næstkomandi en þó er líklegra að ekkert verði af þessu fyrr en að tímabilinu loknu.

Fyrir stuttu hitti Mark Hughes, knattspyrnustjóri City, eigendur félagsins að máli og segir blaðið að hann hafi verið beðinn um að nefna bestu leikmenn heims í hverri stöðu fyrir sig. Eigendurnir telja að allir séu falir fyrir rétt verð, þeirra á meðal John Terry.

Terry hefur hins vegar margoft sagt að hann ætli sér aldrei að fara frá Chelsea sem er uppeldisfélag hans.

Í gær var Gianluigi Buffon, markvörður Juventus, einnig orðaður við Manchester City.