Ekki hægt að yfirheyra konu 18 dögum eftir meinta árás eiginmanns

Lögregla hefur ekki enn getað tekið skýrslu af konu sem lögð var inn á sjúkrahús í byrjun september en grunur leikur á að eiginmaður hennar hafi gengið í skrokk á henni.

Konan er komin til meðvitundar en hefur ekki getað tjáð sig. Samkvæmt heimildum Vísis mun tíminn leiða í ljós hvort konan muni ná sér og geta gefið skýrslu um málsatvik. Friðrik Smári Björgvinsson, yfirmaður rannsóknardeildar lögreglunnar á höfuðborgarsvæðinu, segir að málið sé í rannsókn og lögreglan hafi rætt við aðila sem gætu varpað ljósi á atburðarásina. Mestu skipti þó að ná að ræða við konuna.

Löng saga um ofbeldi einkennir sambúð hjónanna sem eru á sextugsaldri. Samkvæmt heimildum Vísis hefur maðurinn ekki áður verið kærður fyrir heimilisofbeldi en lögreglan hefur áður verið kölluð að heimili hjónanna vegna heimiliserja. Friðrik Smári vildi í samtali við Vísi ekkert geta gefið upp um þetta atriði og sagði að forsagan hefði ekki áhrif á rannsókn hinnar meintu árásar.

Árásin mun hafa átt sér stað fyrir 18 dögum á heimili hjónanna í Breiðholti 1. september. Í kjölfarið leitaði konan á náðir vina og gisti hjá þeim. Samkvæmt upplýsingum Vísis missti konan meðvitund daginn eftir og var hún þá flutt á spítala. Var hún hætt komin vegna blæðingar inn á heila og gekkst undir bráðaaðgerð. Maðurinn var í framhaldinu úrskuraður í gæsluvarðhald sem rann út á miðvikudaginn í seinustu viku.