Vilja Mugabe frá völdum vegna kóleru

Kólerufaraldurinn sem geisar í afríkuríkinu Simbabve magnast dag frá degi. Leiðtogar vestrænna ríkja hafa lýst yfir áhyggjum af ástandinu og vilja að Robert Mugabe, forseti landsins, fari frá völdum.

Stjórnvöld í Simbabve lýstu fyrr í vikunni yfir neyðarástandi vegna kólerufaraldurs. Þau virðst lítið ráða við ástandið en verðbólga þar mælist ein sú mesta í heiminum í dag og íbúar landsins standa frammi fyrir skorti á mat og öðrum nauðsynjavörum. Talið er allt að fimm og hálf milljón manna, eða helmingur íbúa landsins, gæti dáið úr hungursneyð.

Kólera berst í menn með menguðu vatni og matvælum. Erfitt reynist nú fyrir íbúa landsins að fá ómengað vatn.

Stjórnvöld í Simbabve hafa því óskað eftir hjálp alþjóðasamfélgsins til að tryggja íbúnum mat, lyf og læknisaðstoð. Að minnsta kosti fimmhundruð sjötíu og fimm hafa látist af kóleru í landinu og hátt í þrettán þúsund sýkst síðan í ágúst.

Vaxandi þrýstingur er meðal alþjóðasamfélagsins að Mugabe forseti Simbabve að víkji úr embætti.

Condoleezza Rice, fráfarandi utanríkisráðherra Bandaríkjanna, sagði í gær löngu orðið tímabært fyrir Mugabe að víkja. Hún hvatti leiðtoga nágrannaríkja í Afríku til að þrýsta en frekar á Mugabe að segja af sér. Efnahagslegt hrun blasa við þjóðinni og mannúðarvandann aukist dag frá degi. Gordon Brown, forsætisráðherra Breta, hefur tekið undir orð Rice og hvatt alþjóðasamfélagið að senda Mugabe skýr skilaboð um að nóg sé komið.