Bendtner: Ég elska bleiku skóna

Danski framherjinn Nicklas Bendtner hjá Arsenal var hetja liðsins þegar hann skoraði sigurmark liðsins gegn Dynamo Kiev á þriðjudagskvöldið.

Bendtner hafði áður vakið mikla athygli þegar hann frumsýndi nýja skærbleika takkaskó í 3-0 tapinu gegn Manchester City helgina áður.

Daninn er mjög stoltur af bleiku skónum og segist safna öllum takkaskóm sem hann keppir í - og það í öllum regnbogans litum.

"Ég elska bleiku skóna mína og mig hefur langað að spila í þessum lit alveg síðan ég var smástrákur. Ég hef aldrei séð neinn spila í þessum lit og mér finnst hann frábær," sagði Bendtner.

"Ég á ekki von á að aðrir leikmenn Arsenal nái að toppa mig þegar kemur að skóvali - ekki nema þeir mæti í demantsskreittum takkaskóm. Ég efast reyndar um það," sagði Daninn í samtali við Sun.

Bleiku skórnir eru með mynd af danska fánanum og áletrun með nafni hans og segir Bendtner þá í sérstöku uppáhaldi hjá sér.