Fyrstu kaup Newcastle í sumar staðreynd

Newcastle hefur fest kaup á miðvallarleikmanninnum Jonas Gutierrez frá Real Mallorca.

Argentínumaðurinn Gutierrez skrifaði undir fimm ára samning við Newcastle en kaupverðið var ekki uppgefið. Það er talið vera um fimm milljónir punda.

Hann lék á Spáni í þrjú ár og var fyrst valinn í argentínska landsliðið í febrúar á síðasta ári.

„Ég er gríðarlega ánægður með að vera kominn til Newcastle. Það er frábært að spila í ensku úrvalsdeildinni og ég get ekki beðið að hitta mína nýju liðsfélaga og sanna mig fyrir stuðningsmönnum liðsins."

„Það er mikill fengur í Jonas fyrir félagið," sagði Kevin Keegan, stjóri Newcastle. „Ég veit um mörg önnur félög sem höfðu áhuga á að fá hann. Hann verður frábær viðbót við leikmannahópinn."