Villa sagður í viðræðum við City

Spænski framherjinn David Villa er sagður eiga í viðræðum við enska úrvalsdeildarfélagið Manchester City.

Villa er á mála hjá Valencia en kaupverðið er sagt nema 60 milljónum evra. Ef hann færi á því verði yrði hann dýrasti leikmaður Bretlandseyja frá upphafi og einn dýrasti knattspyrnumaður heims.

Eftir því sem kemur fram í götublaðinu News of the World er umboðsmaður Villa á leið til Manchester til að semja um félagaskiptin. Samningur er sagður tryggja Villa 185 þúsund pund í vikulaun en hann yrði þá tekjuhæsti leikmaður ensku úrvalsdeildarinnar ásamt Robinho sem einnig leikur með City.